"Արարատ-մեգըզինի" կողմից Զարուհի Փոստանջյանը ճանաչվել է ամենաակտիվ հասարակական-քաղաքական գործունեություն ծավալած կին պատգամավորը, դառնալով ամսագրի տարեմուտի համարի դեմքը։ Թեեւ մեր ամսագիրն ունի տնտեսական ուղղվածություն, բայց Նոր տարվա շեմին ամսագրի շապիկին տեղ գրավելու հնարավորությունը ստացավ քաղաքական գործիչը, ԱԺ պատգամավորը և պարզապես հմայիչ կինը։ Գաղտնիք այստեղ չկա։ Դրանով ցանկացել ենք հանդուրժողականության և փոխհասկացողության կոչել մեր պետական, քաղաքական, տնտեսական գործիչներին, համատեղ դիմագրավելու համար մեր երկրին և ժողովրդին սպասվող սոցիալ-տնտեսական մարտահրավերները։

Հիշեցնենք նաեւ, որ ամսագրի առաջին համարի շապիկին նույնպես կին էր՝ ֆրանսահայ գործարար Լյուսի Նանուքյանը։ Իսկ այս համարում ներկայացված են եւս երկու հայտնի կանայք՝ Հայաստանում Արժույթի Միջազգային Հիմնադրամի (ԱՄՀ) մշտական ներկայացուցիչ Նինկե Օմեսը և Հայաստանի պետգույքի կառավարման վարչության պետ Կարինե Կիրակոսյանը։